光の喵砂利用天然食材，經高溫滅菌、臭氧消毒、雜物篩離及打粉、高壓出模、離子吸附、真空包裝等62項工序。製成主動殺菌消臭並可降解的功能性豆腐砂，食品級材料皆通過食品安全檢測，即便誤食亦無誤。

 

如果貓砂顆粒圓潤光滑、尺寸細、質地軟，可以提高腳感舒適度，貓仔比較容易接受。但當表面過度光滑， 吸水效能就會降低。質地過軟就容易化粉，唔單止影響貓仔呼吸系統，亦會導致塵土飛揚。 我哋試過60幾種組合，先拿捏到依個平衡點。

 

但係問題嚟喇，我哋會發現屋企周圍都係貓砂。睇嚟冇乜所謂，實際上好鬼核突，咁同你將抹過嘅廁紙放喺床上有咩分別？

 

為解決呢個問題我哋長時間地觀察，留意到貓仔去廁所嘅時候， 尤其係開大個陣，後腳腳趾罅係會sa開。而貓仔撥貓砂嘅時候，佢嘅手指都係會擘開，呢個時候啲貓砂就會攝咗喺手指或腳趾罅。 我哋用電子卡尺（digital caliper）量度超過40隻唔同品種、年齡嘅貓，多過嘅500條腳趾罅，發現腳趾罅嘅闊度一般係4至6毫米。所以光の喵砂特意鑄造6.5毫米圓盤形貓砂顆粒模具。呢個尺寸最啱貓咪， 踩上去唔覺岩巉，size亦唔會攝到腳趾罅，可以將貓砂被帶離貓砂盤嘅比例，懸崖式咁降低95%。

 

圓盤形嘅貓砂嘅體積跟表面積比例（Surface to Volume Ratio）比球形或者長條型嘅貓砂大幅增加，所以更有效增加吸水性同埋吸收速度。

 

真空包裝唔係淨係為咗靚，隔絕咗空氣可以降低貓砂、水、氧嘅接觸，延長保質期同減低變壞風險。 採用食用級原材料、零添加劑同零化學成份。 安全係獅子寵工對貓砂嘅最基本的要求。原料全天然，即便誤食都唔會產生問題，貓主可安心購買和使用。

 

同其他產品唔同，光の喵砂無用廉價香精去「除臭」。 純粹用食物氣味嚟冚住臭味因子，咪等同喺公廁度用雞髀味嘅香薰（如果KFC有出嘅話），簡直匪夷所思。「無味」先至係皇道。

 

而且個包裝紙箱都經過仔細設計，能夠成為「貓之封印」盒。 個盒裏面已經噴咗防水層，所以你亦都可以將個紙箱當做貓砂盤， 夠晒衛生，又環保。

 

每粒光の喵砂都經數十工序，從外至內顛覆現時規格，反映出獅子寵工對產品卓越質素的追求。

 

嗱， 唔使我講相信你都知，每一粒光の喵砂都係本土製造。

​