豆腐砂唔係廁紙，揀啱先至可以放心將豆腐貓砂沖馬桶。

你會唔會屙屎響垃圾桶？又或者將抹完羅柚嘅廁紙放喺垃圾桶？

如果會，請你向你信得過嘅大人講，並且建議撥打「情緒支援熱線 」18111。

不過，我都識好多人會將啲沾滿貓大便嘅貓砂倒去垃圾桶。乜啲貓屎衛生啲咩？

其實直接將用過嘅貓砂沖入馬桶係最衛生。唔單止唔使屋企充滿異味，亦都避免貓仔將啲污糟嘢踩到四圍都係。更加減少貓仔之間嘅傳染病會交叉感染。對於養咗好多隻貓嘅人，尤其係養咗啲老貓或者體弱嘅貓，就最為重要。

豆腐貓砂嘅結構同廁紙其實有好多相似之處，都係用植物纖維製成，都係能夠大量吸水，都係溶於水。同埋，豆腐貓砂都係可以沖廁所嘅。

真豆腐貓砂係可以沖廁所嘅

根據香港法例第123I章《建築物 (衞生設備標準、水管裝置、排水工程及廁所)規例》, 污水渠（糞渠Soil Pipe） 直徑必須係80毫米以上。 所以就算你尋日食咗金菇肥牛卷，今朝排出一抓6公分長嘅金菇（see-you-tomorrow mushroom），理論上都唔會塞屎渠。而根據行業實務守則，一般嘅廁紙，為咗令佢哋浸水之後可以有足夠嘅水溶性，避免結聚並且堵塞去水口，所以必須使用4毫米以下嘅短纖維製造。真正嘅豆腐貓砂同埋廁紙一樣，遇水後會溶解成為懸浮液（suspension fluid），並隨著水流而四散，因此可以順利通過整個污水系統。

但係市面上有好多豆腐貓砂會溝啲膨潤土去增加結團力，令到貓砂遇到貓尿之後盡快結成一嚿方便鏟走。 如果你將依種混合型豆腐貓砂倒入廁所，你就大鑊。因為膨潤土唔可以用水去溶解，而且佢哋仲會將其他沖落嚟嘅貓砂結成更加大嚿嘅貓砂團，最後堵塞整個污水系統。 如果你住村屋，個化糞池塞咗，啲屎水就唔會咁去地面影上去擠 如果你住村屋，個化糞池塞咗，啲屎水就會係咁擁上地面，簡直係災難現場。

有啲豆腐貓砂更加會混合其他不能溶解嘅物料，包括香精珠，活性炭顆粒。 係怕你唔死。

正所謂唔怕神一般嘅對手，最怕豬一般嘅隊友。你快啲去睇吓包貓沙有啲乜嘢喺裏面。

唔係隻隻豆腐貓砂都可以沖馬桶